Jayaramaiah Kappaganthu Books

          * వానమ్మా!రావమ్మా! *(గేయం) వానమ్మా!వానమ్మా!రావమ్మా!వానమ్మా! వానమ్మా!వానమ్మా!రావమ్మా!వానమ్మా! రావమ్మా!వానమ్మా!మాబతుకులు నిలుపమ్మా! వానమ్మా!వానమ్మా!రావమ్మా!వానమ్మా! నిన్ను నేలమ్మను నమ్మి నాగేలు పట్టేటోళ్ళం ఇంటిల్లపాది చెమట శ్రమశక్తిగ మార్చేటోళ్ళం మెట్టభూముల్లోనే మెతుకులు పండించేటోళ్ళం అందరికి అన్నం పెట్టి ఆకలిని తీర్చేటోళ్ళం జీవనమే జీవితమంటూ జీవించేవాళ్ళం అమ్మా కల్తీమందులతోటి కష్టాలు ఎదురవుతున్నా మొలకెత్తని విత్తుల మోసం మా ఆశలు తుంచేస్తున్నా ధర గిట్టుబాటు లేక మా అప్పులు తీరకున్నా మనువాడ మా బిడ్డలను మరి అందరు వద్దంటున్నా సేద్యాన్నే వదలని వాళ్ళం! గ్రామాలను విడువని వాళ్ళం చిత్త స్వాతికార్తెల చినుకు రాలకపోయె! పదునయ్యే అదనుకాలం పరిగెత్తిపోతా ఉండె ఎండుదుక్కి తడవలేదు ఎద్దులు రంకెయ్యలేదు నల్లనిమేఘం కోసం నాలుగు దిక్కులు చూస్తూ దిగజారిన గుండె ధైర్యం దీనంగా వేడుతు ఉంది.   రచన: కప్పగంతు జయరామయ్య            (Oct 2018)            పొందూరు - Phone: 9912117372

           * రాజకీయ కీకారణ్యం * (కవిత) గ్రామీణ రాజకీయ కీకారణ్యం వర్గ వైషమ్య క్రూరమృగ గర్జనల భయారణ్యం వర్గాధిపత్య రాజకీయ కుటిల నీతిలో తల్లడిల్లుతున్న తటస్థ జీవాలు వర్గ అస్పృశ్యతను ఆశ్రయిస్తూ పాయలుగా చీలుతున్న ప్రార్థనా మందిరాలు ముఠాపిచ్చి తలకెక్కితేనే వినాయక నిమజ్జనాలు వైభవోపేతం వికలాంగుడైనా వృద్ధురాలైనా వర్గతీర్థం సేవిస్తేనే కాని లభించని ఫించను ప్రసాదం రాజీపదవుల పందారంలో తటస్థ మేథావుల సేవాభిలాష అడవిన కాచిన వెన్నెలలే! అందలమెక్కుతున్న అసమర్ధ నాయకత్వం ప్రత్యర్ధుల పతనమే ప్రధాన ప్రణాళిక వర్గాభివృద్ధి వటవృక్షనీడలో కునారిల్లుతున్న గ్రామాభ్యుదయం పాలనాధికారుల పారదర్శకతపై పైశాచిక స్వారీల పాలనాపర్వం వర్గమద్యపానాలకు బానిసలవుతున్న గ్రామీణ సామ్యవాద కోయిలలు ఆపివేసిన అరుణరాగాలాపన ఆలపిస్తున్న అన్ని రంగుల రాగమాలిక పట్టణాల వ్యామోహం పల్లెల్లో బతకలేనితనం వలస బాటలో మానవ నైపుణ్యాలు పల్లె తల్లీ! నీ సీమ అభయారణ్యం  మరల ఎప్పుడవుతుంది?                             ********* రచన: కప్పగంతు జయరామయ్య   ...

                   * మనభాష * (గేయం ) ముద్దులొలికే భాషరా!ముచ్చటైన భాషరా! తేనెలూరెడి భాషరా!మన తెలుగు భాషను చూడరా! అవనియందున భాషలన్నిట సాటిలేని భాషరా! అంతులేని పదసంపద ఆంధ్రభాషకు సొత్తురా! అన్యభాషా పదములెన్నో ఆదరించిన భాషరా! సకల భాషావేత్తలందరు సన్నుతించిన భాషరా! ఆశుకవితన రాటుదేలిన అవధానులనడగరా! జ్ఞానదాయకమైన ఓషధి తెలుగు భాషన ఉందిరా! ధర్మబోధలు మనిషి విలువలు బడుగు జీవుల బతుకులు పద్య నాటక కవితలందున పలకరించిన భాషరా! తెలుగు మాధ్యమమందు బోధన శాస్త్రీయం నిజముగా జ్ఞానమంతయు మెదడు కెక్కును సులువుగా సరళంబుగా మాతృభాషను మరచి పోకుమ! తెలుగు భాషణ విడువబోకుమ! తెలుగువాడిగ పుట్టినందుకు గర్వపడరా!సోదరా! తెలుగువనితగ పుట్టినందుకు గర్వపడవే!సోదరీ!                   ******** రచన: కప్పగంతు జయరామయ్య            (Dec 2013)            పొందూరు - Phone: 9912117372

                * ఏది తల్లీ! భారతీయత * ఏది తల్లీ! ఏది తల్లీ! నీవు పెంచిన భారతీయత ఏది తల్లీ! ఏది తల్లీ! నీవు నేర్పిన సత్యసంధత ఏది తల్లీ! ఏది తల్లీ! ..... ఏది తల్లీ! ఏది తల్లీ!  నిత్యకృత్యం హింసవాదం పడగ విప్పిన రాక్షసీయం భాష కులములు ఆయుధాలుగ గద్దెనెక్కే సాధనాలై రెచ్చగొట్టి రగుల్పొల్కే రాజకీయ దమన నీతిలో ॥ ధనమదాంధుల స్వార్ధపరుల దోపిడీలో నలుగుతున్న నేటి విద్యాతల్లిప్రేమకు నోచుకోని బడుగు బాలురు దారితెలియక దిక్కుతోచక దారి తప్పే వేళలందు ॥ ఆర్ధికంబగు పుష్టికోసం ప్రభుత మద్యం నాశ్రయించగ ఎదురు తిరిగిన తెలుగుమహిళ గొంతు పిసికి పరిహసించిన ప్రజాస్వామ్యపు ఏలుబడిలో ఉన్న భారతమిదా తల్లీ ॥ ఆడపడుచుల ఆర్తనాదం మోయలేని పన్నుల భారం నింగికెగసెడి ధరల వెంబడి సాగలేని సగటు మనిషి నడ్డివిరిగిన మధ్యతరగతి మనుగడే ప్రశ్నార్ధమైతే ॥ స్వల్పకాలిక స్నేహహస్తం అంతలోనే మిత్రభేదం పదవి కోసం పాకులాటలు నీతిమాలిన పొత్తులు సామ్యవాదమె కొత్తభాష్యం కోరుతున్న రోజులందు ॥                       ********* రచన: కప్పగంతు జయరామయ్య (1999)   ...

                 ** పుత్రవేదన **(గేయం) పల్లవి: అమ్మా!నిను ఒక్కసారి చూడాలమ్మా! రగులుతున్న గుండె బాధ చెప్పాలమ్మా! మాతృసేవ పరమార్ధం మరచానమ్మా! కన్నీళ్ళతో కవిత వ్రాసె వినరావమ్మా! అమ్మా! అమ్మా! అమ్మా! అమ్మా! చరణములు: 1.పాలిచ్చి ప్రాణమిచ్చి పాలన చేసి ఆపదల బారినుంచి అనునిత్యం రక్షించి అమ్మవైన నిన్ను నేను ఆదరించలేదమ్మా! నీ ఆశలు వమ్ము చేసి పాపాత్ముడినైతినమ్మా!   ॥ 2.కొసరి కొసరి గోరుముద్దలెన్నో తినిపించినావు మలమూత్రములన్ని కడిగి మాతృమూర్తివైనావు మంచాన పడిన నిన్ను మనసారా చేరదీక వేదనకు గురిచేసిన దయలేని కొడుకునమ్మా!   ॥ 3.నా పాపం తలచుకొంటె నాకే సిగ్గేస్తుంది. నీ రూపం మెదలుతుంటె దుఃఖంఉబికొస్తుంది. తల్లి మనసు కనుక నీవు నన్ను క్షమియించినా నా అంతరాత్మ ఎన్నటికి నన్ను క్షమియించదమ్మా!  ॥                            ***** రచన: కప్పగంతు జయరామయ్య (2015)            పొందూరు           phone: 9912117372

             **విరహానందం** [కవిత] పసితనంలో పరిఢవిల్లిన స్నేహం చిలిపి తగాదాలలో చిగురించిన అనురాగం అనురాగపు ఆలంబనతో అవతరించిన అమలిన ప్రణయం మౌనభావనల మురళిగానం వినిపించిన మోహనరాగం చూపులతోనే చెప్పుకొన్న ప్రేమఊసులు మూగభాషలలోనే మురిపించే సరసాలు అతని మాట పాలించుటే ఆమెకు వేదం ఆమె సాంగత్యంలో విహరించుటే అతనికి ప్రాణం నవ్వుల పువ్వులతో ఆశల అక్షతలతో వరిపోచల విరిమాలలతో ఇంకుల వసంతాలతో అవధులు దాటని యవ్వనాలు పెనవేసుకొన్న ప్రణయ బంధం మనసులతో మనువాడాలనుకొంది విద్యార్జనే తొలి విద్యుక్త ధర్మమై పైతరగతులకు సాగిన ప్రయాణం ప్రేమ పిపాసులను విడదీసి ప్రణయ వృక్షంపై పిడుగును రాల్చింది మూగ రోదనలోనూ మూతపడని చదువులు విరహవేదనలోనూ వీడని బాధ్యతలు కాలగమనంలోనూ కాంతులు తగ్గని ప్రేమజ్యోతులు పరిస్థితుల ప్రాబల్యం ప్రణయానికి విడాకులిచ్చింది. మారిన సంఘటనలు మరొకరితో మనువు జరిపించింది అల్లుకొన్న ప్రేమగూడు చెదిరినా ప్రేమజంట బెదరలేదు ఆత్మహత్యల ఆగడాలు అశ్లీలపు అరాచకాలు తరగతి గదిలో తంతుధారణలు యాసిడ్ దాడుల పైశాచికాలు విరహాగ్నితో వింత వ్యసనాలు కడుపు తీపిని కబళించే క్రూరచేష్ట...

             ** తస్మాత్ !జాగ్రత్త [కవిత] ** అన్నమిచ్చి ఆకలి తీర్చి  అహోరాత్రులలుపెరుగని శ్రమకూర్చి అన్నివృత్తులకాధార జీవన కేంద్రమై గ్రామీణభారతానికి గరిమనాభియై అలరించిన అన్నదాత  ఋణబాధలో ! రామచంద్రా!  అంటూ అరిచిన ఆక్రందనలు  బధిర శంఖారావాలై  అరిచి, విసిగి, వేసారి  దారుణమైన అప్పుల సంద్రాన్ని దాటలేక  దరి చేర్చే దయాగుణము కానరాక  ఆదరణకు దూరమై,అడ్డుకొనేవారు లేక  జన్మంటూ వుంటే రైతుగా జన్మించనని  శపధం చేస్తూ,శపిస్తూ  ఆత్మహత్యల ఆశ్రమానికి తరలిపోతున్నాడు  ఆగని అనునిత్యపు ఈ కర్షక మేధం  పరంపర బలవన్మరణాల విషాదం  దోపిడి దొంగల భయానక హత్యలు కావు  తీవ్రవాదం చేస్తున్న మారణకాండకాదు న్యాయస్థానాలు విధించిన ఉరిశిక్షలు కావు  కడుపు నింపిన జాతిపై కృతజ్ఞతే లేని కసాయితనం వ్యవసాయమన్నది వృధా జీవనమైతే కర్షకుడన్నవాడు కనుమరుగైతే  అవనియంతా అంతర్జాలాలు,ఆకాశ హర్మ్యాలైనా  అన్నమే దొరకని ఆ నవీన కాలంలో  పాలకులుండరు, ప్రతిపక్షాలుండవు  అదికాదా!అసలు ప్రజలే లేని యుగాంతం  ఇదికాదా!అర్ధాశలతో అసువ...

         **విభజన గాయాలు(గేయం)** దగాబడ్డ సీమాంధ్రుడా! పగ రగిలే సింహమై గర్జించరా! ఎన్నాళ్ళీ మోసాలు! ఎన్నెన్ని అవమానాలు! నీలోని చైతన్యం మేల్కొల్పుకో! ఉద్యమాన నీ హక్కులు సాధించుకో! 1.మొన్నేమో మదరాసు నిన్నేమో హైదరబాదు మనవే అని అనుకొన్నాం మన చెమటతో నిర్మించాం వరుస వరుస వంచనలు మన గూడును దోచేయగ దేశరాజకీయాలకు అలుసయ్యెను ఆంధ్రజాతి తరిమేసెడి ఛీత్కారాలు తలుచుకోర ఒకసారి విభజన వేదనలన్నీ వినిపించర మరోసారి  ॥ 2.అమరజీవి ఆత్మార్పణ మపహాస్యం చేయబడి కుటిల రాజకీయాల కుళ్ళంతా ఒక్కటయ్యి చేవలేని మన నేతల చేతగాని తనం వలన పెద్దరికం ప్రశ్నించని కౌరవసభ రాజనీతి బలవంతపు విడాకులతో తెలుగు నేలనే చీల్చగ ఆ నిర్భంధపు విభజనకు ఘొల్లుమనె సీమాంధ్ర 3.విభజన చట్టము లోన వినిపించిన తాయిలాలు దాటవేస్తూ దగాచేస్తూ దారుణాలు చేస్తుంటే మౌనాన్ని వీడకుంటే మనుగడే లేదు నీకు టంగుటూరి అల్లూరికి వారసులం మేమంటూ నీ జాతి పౌరుషాన్ని నినదించి చాటరా! నీ ఆత్మగౌరవాన్ని ఎలుగెత్తి చెప్పరా!  ॥                    ********* రచన: కప్పగంతు జయరామయ్య (2019)       ...

మాఊర కొలువుదీర[భజన పాటలు]